Is mian leis an gComhairle Ealaíon comhbhrón ó chroí a dhéanamh le muintir agus cairde Steve MacDonogh, foilsitheoir, eagarthóir agus scríbhneoir Éireannach, a fuair bás go tobann inné.
Bhí MacDonogh, a bhunaigh Brandon Books sa bhliain 1982, ina cheannródaí i réimse foilsitheoireachta liteartha na hÉireann agus chuir sé glórtha liteartha nua chun cinn gan staonadh. Bhí obair chliste, straitéiseach, eachtrúil, chróga ar bun aige mar fhoilsitheoir, agus bhí meas ag a chomhghleacaithe in Éirinn agus thar lear air. Thacaigh sé le scríbhneoirí ag gach céim dá ngairm, agus mairfidh tionchar a shaothair ar léitheoirí na hÉireann ar feadh na nglún amach anseo. Braithfear uainn go mór é.