Rinne an Chomhairle Ealaíon comhghairdeas le Matthew Talbot-Kelly, a stiúraigh an gearrscannán “Blind Man’s Eye” agus ar tugadh cuireadh dó páirt a ghlacadh i bhFéile Scannán Idirnáisiúnta na Veinéise a bhfuil clú agus cáil uirthi.
Ba é Neil Leyden a scríobh agus ba é Michael Algar a léirigh an scannán beochana seo a fuair maoiniú faoin scéim 'Frameworks' ón gComhairle Ealaíon, Bord Scannán na hÉireann and RTE agus is é seo an t-aon scannán Éireannach sa chomórtas.
Fad sé nóiméad atá sa scannán seo a úsáideann ardteicnící beochana chun scéal a insint faoi smaointe osréalacha seanfhir agus é ina shuí ar an trá is ansa leis.
Ag labhairt di faoin ngaisce seo dúirt Mary Cloake, Stiúrthóir na Comhairle Ealaíon: “Is mór an t-éacht atá déanta ag Matthew Talbot-Kelly agus a fhoireann. Tá scannánóirí agus beochantóirí na hÉireann amuigh chun tosaigh maidir le scéalaíocht nuálaíoch agus is sampla cruthanta dá saothar an scannán seo. Cúis ríméid don Chomhairle Ealaíon go raibh páirt acu i saothar Matthew a chur os comhair lucht féachana an Domhain ag Féile Scannán na Veinéise."