Is comhthionscnamh idir an Chomhairle Ealaíon agus an Ceoláras Náisiúnta é Dámhachtain Liam O’Flynn mar chuid den chomhoibriú atá ar bun acu chun na healaíona traidisiúnta a chur chun cinn, tuiscint ar na healaíona traidisiúnta a chothú agus léiriú a dhéanamh ar a thaitneamhaí atá na healaíona traidisiúnta; tá an fhéile cheoil thraidisiúnta Tradition Now mar chuid den obair seo freisin.

Déantar ceiliúradh le Dámhachtain Liam O’Flynn ar ról an ealaíontóra chruthaithigh thraidisiúnta aonair maidir le saothar nua a chruthú, comhshaothar agus nuálaíocht a chur chun cinn agus na healaíona traidisiúnta a sheachadadh ionas go mbeidh an chéad ghlúin eile in ann taitneamh a bhaint astu agus iad a chleachtadh.

Is é aidhm Dhámhachtain Liam O’Flynn tréimhse machnaimh, inspreagtha agus cruthaithe a chur ar fáil d’ealaíontóir traidisiúnta ar mhaithe leis an ealaín agus é/í ina (h)ealaíontóir cónaitheach sa Cheoláras Náisiúnta agus chun tuiscint agus eolas ar na healaíona traidisiúnta agus an taitneamh a bhaintear as na healaíona traidisiúnta a mhéadú i dtimpeallacht shaibhir an Cheolárais Náisiúnta.

Is iad cuspóirí na dámhachtana:

• Timpeallacht atá tacúil, spreagúil agus dúshlánach go healaíonta a chur ar fáil don ealaíontóir traidisiúnta roghnaithe.t

• Spás oibre fisiciúil a chur ar fáil dá t(h)áirgeadh ealaíonta machnamhach agus cruthaitheach.

• Tacú le comhoibriú ealaíonta.

• Caidreamh oibre a éascú le Foireann Foghlama agus Rannpháirtíochta an Cheolárais Náisiúnta.

• Gabháil le luchta féachana agus éisteachta na n-ealaíon traidisiúnta. ;

Roinntear Dámhachtain Liam O’Flynn ina dhá chuid:;

• €10,000 le caitheamh ar tháillí agus ar chostais mhaireachtála le linn na tréimhse. Cuirfidh an t-airgead sin ar chumas an ealaíontóra taighde atá bunaithe ar chleachtas agus obair chruthaitheach a dhéanamh sa Cheoláras Náisiúnta

• €5,000 le caitheamh ar tháillí agus costais eile a bhainfidh leis an gcomhoibriú le healaíontóirí eile agus saothar idir lámha a chur i láthair.

• Spás oibre sa Cheoláras Náisiúnta

• Tacaíocht ghairmiúil agus comhairle ar ghairm beatha

Glactar le hiarratais ar Dhámhachtain Liam O’Flynn ó ealaíontóirí a oibríonn in aon cheann de na seánraí seo a leanas: ceol uirlise; amhránaíocht; damhsa; na healaíona béil ar nós na scéalaíochta, agallamh beirte nó lúibíní. Cuirtear fáilte roimh iarratais ar Dhámhachtain Liam O’Flynn ó ealaíontóirí sinsearacha, ó ealaíontóirí seanbhunaithe agus iad i lár a ngairme, agus ó ealaíontóirí óga agus atá ag teacht chun cinn..

Bronntar dámhachtain amháin i 2023.